Ёкозүна Хакүхо, Маэгашира Футэно нар башёг хошуучилж байна

Шинэчлэгдсэн: 2008-01-17 12:36:31 УБ

Мэргэжлийн Сүмо бөхийн Хацү башёгийн дөрөв дэх өдрийн барилдаан болж өнгөрлөө. Энэ удаа үзэгчдийн сэтгэлийг хөдөлгөсөн олон сайхан барилдааныг Монгол бөхчүүд маань үзүүлсэн юм.

Хацү башёгийн дөрөв дэх өдрийн барилдаанд их аварга асашёорюү Д.Дагвадорж япончуудын “шинэ үе” хэмээн нэрлэдэг залуу бөх Гойэдотой оноолт таарч барилдав. Залуу хүн хэдийгээр хүчтэй байсан хэдий ч их аварга маань түүнийг хөнгөхөн дэвжээнээс гаргачихсан. Гойэдо их аваргатай анх удаа барилдаж байгаа бөгөөд түүнээс эмээж байгаагаа сэтгүүлчдээс нуугаагүй юм. Ямартай ч түүнд ихээхэн сургамж болсон биз. Харин хакухо М.Даваажаргал оноолт ёсоор Точинонадотай барилдсан юм. Тэрээр эд гялалцаж яваа аварга гэдгээ энэ барилдаанаар харуулж Точинонадог өвдөг шороодууллаа.

Харин маэга ширагийн наймд эрэмбэлэгдсэн Какирюү н.Ананд өчигдөр Хомашотой барилдан өрсөлдөгчөө унагаж чадлаа. Гурван өдрийн дараах байдлаар хоёр унаа нэг даваатай болоод байсан түүний хувьд энэ даваа их чухал байсан гэж сумогийн мэргэжилтнүүд онцолсон. Харин гурван өдрийн дараах байдлаар тэмцээнийг хошуучилж явсан Кёктэнхо Н.Цэвэгнямын хувьд гүржийн бөх Коккайг барсангүй. Мөн энэ өдөр Ама маань амжилттай барилдаж чадсангүй.

Тэрээр Котошогикүтэй барилдсан бөгөөд золгоон дээр алдаа гаргасанаас өвдөг шороодлоо. Комүсүби цолоо эргүүлэн аваад байгаа Хүчитбаатарын хувьд озэки Каойтой оноолт таарч барилдсан бөгөөд Каойг хаяж сурсан гэдгээ нотлон харуулав. Тэрээр өмнөх хоёр башёд Кайог унагаж байсан юм. Их аваргын дэвжээний анд Асасэкирюү Б.Дашням энэ өдөр дээд зиндааны хамгийн жинтэй бөх Миябияматай барилдсан бөгөөд даваа авч чадсангүй. Дөрвөн өдрийн дарах байдлаар маэгашира Футэно, Ёкозүна Хакүхоо нар нэг ч унаагүй башёг тэргүүлж эхэлжээ.

Харин өчигдөр Жюүро зиндааг тэргүүлэн барилдаж байгаа манай бөх Рюү о Санчирболд дээд зиндаанд дэвшин барилдаж өрсөлдөгчөө өвдөг шороодуулсан Ингэсэнээр тэр Жюүро зиндааг тэргүүлэгчийнхаа байр суурийг хадгалж үлдэв. Энэ башёгийн Жюүро зиндаанд манай зургаан бөх барилдаж байгаа бөгөөд өчигдөр Коорюү Мөнх-Оргил, Воко нами Базарсад, Хошихикари Лхагва нар даваагаа ахиулж Тамаваши Мөнх-Оргил, өвдөг шороодсон байна.

/2008.01.17/