|
Дэлхийн нэртэй математикчид манай сурагчдыг шагшжээ
Шинэчлэгдсэн: 2008-01-24 10:48:43 УБ Нийслэлийн ерөнхий боловсролын нэгдүгээр сургуулийн 85 жилийн ой энэ онд тохиож байгаа юм байна. Монгол Улсын шинэ үеийн боловсролын салбарын үлгэр жишээ болсон ууган сургуулийн захирал Ц.Гүррагчаатай уулзаж ярилцсанаа толилуулъя.
-Нэгдүгээр сургуулийг манай улсын хамгийн ууган сургууль гэдэг. Хэдэн онд байгуулагдсан юм бол?
-Манай сургууль 1923 оны хоёрдугаар сарын 16-нд голомтоо бадраасан түүхтэй. Энэ жил 85 жилийн ой нь тохиож байна. Ууган дунд сургууль, улсын тэргүүний сургууль, Хөдөлмөрийн гавьяаны улаан тугийн одонт гээд анхны тодотголоор манайх баян шүү. 1933 онд Гэгээрлийн яамны сайдын тушаалаар Үлгэр жишээ дунд сургууль болсон байдаг. 1950 он хүртэл Монгол орны өнцөг булан бүрээс сурагчид ирж суралцдаг, 1960-аад оны үед гадаадад суралцах сурагчдыг бэлтгэж байсан юм билээ. Их зохиолч Д.Нацагдорж, төрийн шагналт зохиолч Д.Намдаг, Наваан-Юндэн, ардын зураач Намхайцэрэн, соён гийгүүлэгч О.Намнандорж нарын шинэ үеийн сэхээтнүүд 1926 онд Ленинградын бэлтгэл сургуульд явахаасаа өмнө суралцаж байсан түүх ч бий. 1997 онд олон улсын математикийн олимпиадын алтан медаль, 2006 онд олон улсын физикийн олимпиадын мөнгөн медалийг анх удаа эх орондоо авчирсан. Нэгдүгээр сургуулийг би Монголын сэхээтний бүхэл бүтэн давхаргыг бүрдүүлэхэд жинтэй хувь нэмэр оруулсан гэгээрлийн өргөө гэж боддог. Төгссөн алдар суутнуудыг тоочно гэвэл барагдашгүй.
-Төрөлх сургуулийнхаа ойгоор ямар үйл ажиллагаа зохион байгуулж байна даа?
-Бид ойгоо тэмдэглэнэ гэж өргөн утгаар зарлаж сурталчлаагүй. Хамгийн гол нь бүтээлч ажил үлдээе, сургуулийнхаа менежментийг сайжруулъя гэж чармайн ажиллаж байна. Манай сургууль Сүхбаатар дүүргийн болон нийслэлийн математикийн олимпиад, улсын математикийн олимпиадын их сунгаа, “Олон улсын хот хоорондын их сорил” физикийн олимпиад, төвийн бүсийн сургуулиудын бага боловсролын сургалтын чанарын уралдаан зэрэг томоохон үйл ажиллагааг жил бүр зохион байгуулдаг.
-Өнгөрсөн оныг танай сургуулийн сурагч, багш нар ямар амжилтаар үдэв?
-2007 онд манай сурагчид Вьетнам, Казахстан, Белорусс, Бразил улсуудад зохиогдсон олон улсын математик, физик, байгалийн ухааны олимпиадаас нэг алт, мөнгө, хүрэл медаль тус бүр гурвыг авчирлаа. Улсын олимпиадаас гурван алт, есөн мөнгө, арван хүрэл медаль авсан байна. Сургуулийн сагсан бөмбөгийн баг улсын аваргын цомыг сүүлийн жилүүдэд авсан бол цэнгээнт бүжгийн тэмцээнээс хүрэл, гандболын улсын аваргын мөнгөн медалиар энгэрээ мялаацгаалаа. Энэ он гараад “Их сорил-2008” физикийн улсын олимпиадыг зохион байгуулсан. 62 сургуулийн 819 хүүхэд оролцсоноос манай сургууль багаараа нэгдүгээр байр эзэлсэн. Сая Казахстаны Алма-Аты хотноо болсон олон улсын математикийн олимпиадад манай сургуулийн баг Монгол Улсаа төлөөлөн амжилттай оролцоод ирлээ. Зургаан хүүхдийн тав нь медаль авахад дэлхийн өнцөг булан бүрээс ирсэн нэртэй математикчид хаанаас ирснийг нь лавлан, “Монголд ч сургалтын чанар сайн юм аа” гэж гайхаж байна гэсэн.
-Монголын багш нарын баяр удахгүй болох нь. Багш нар чинь ч бас амжилт гаргаж байгаа байлгүй?
-Багш нарын баяр угтсан уралдаан тэмцээнд сайн оролцож байгаа. СБД-ийн ерөнхий боловсролын сургуулиудын дунд зохиогдсон урлаг, спортын наадамд манай багш нар тус тус тэргүүн байр эзэлсэн нь амжилт ямар байгааг илэрхийлэх болов уу. 2007 онд “Шилдэг үнэлгээтэй сургууль” өргөмжлөлийг гардсан нь манай багш, эцэг эх, сурагчдын гурвалсан холбоо ямар үр дүнтэй ажиллаж байгаад тавьсан дүн гэж ойлгож болно.
-Японы мэргэжлийн сумогийн 69 дэх их аварга Хакухо М.Даваажаргал танай сургуулийн сурагч байсан гэж сонссон юм байна. Эх орондоо ирэхээрээ сургуулиараа зочилно биз?
-Их аварга маань манай сургуульд нэгдүгээр ангиасаа долдугаар ангиа төгстөл сурч байгаад Япон улс руу явсан байдаг. Манай сургуулийн нэгэн бахархал нь М.Даваажаргал юм. Төрөлх сургууль дээрээ хоёр ч удаа ирсэн. Өнгөрсөн намар харин найр хурим гээд зав зай муутай байсан болохоор ирж амжаагүй. Хуримынхаа маргааш өдөр л Япон руугаа ниссэн байсан.
/2008.01.24/
|
GlobalCEO: Миний дэлгүүрийн сүлжээнд ажиллав
