Т.Цэрэнпүрэв: Нутгийн минь уулс тулж, гэр бүлийнхний маань заяа түшсэн байх

Шинэчлэгдсэн: 2008-01-25 11:22:15 УБ

Түлш, эрчим хvчний яам­­ны Төрийн нарийн бич­гийн дарга Т.Цэрэнпүрэв­тэй уулзаж ярилц­­лаа. Түү­нийг автома­шины осолд орж бие нь муу байсныг уншигчид санаж байгаа байх.

Дундговиос хө­дөл­сөн хоёр машин зэрэг ша­хуу осолдож гурван хүн нас барж, дөрвөн хүн хүнд, хөнгөн гэмтсэн юм. Тэд­ний нэг Төрийн нарийн бичгийн дарга Т.Цэрэн­пүрэвийн ярианд ан­хаар­лаа хандуу­лъя. Тэрбээр сууж босох бүрийдээ хө­дөл­гөөн нь маш удаан өвчний зовиур байгаа нь илт хараг­даж байв.

-Таны биеийн байдал яаж байна?
-Шинэ оны өмнө ажилдаа орсон. Биеийн байдал гайгүй сайн болж байгаа. Ажлын бүрэн цагаар ажиллах бо­ломжтой ч гам барих, физик эмчилгээ хийлгэх зэргийг зохицуулаад хамт олныхоо дунд дажгүй.

-Тухайн үед та ямар ажил албаар хөдөө явж байв?
-Өмнөговь аймаг руу ал­бан томилолттой. Тус айм­гийн Дулааны цахилгаан стан­цын өвөлжилтийн бэлтгэл ажлыг шалгах, тэнд баригдаж байгаа эрчим хүчний шу­гамын хөрөнгө оруулалтын гүйцэтгэлтэй танилцах, хянах ажилтай явсан. Ээлжит томи­лолтоор явж байгаад ийм юманд орчихсон доо.

-Танай багт хичнээн хү­мүүс явсан бэ?
-Жолоочтойгоо дөр­вүүлээ явсан. Эрчим хүчний судал­гаа хөгжлийн төвийн Балган, манай жолооч. “Өнөөд­рийн монгол” сонины эрхлэгч С.Цэм­­бэлдорж маань явсан. Тэр залуу манай Дунд­говийнх. Харамсалтай нь тэр сайхан залуу нас барсан. Дундговьд болсон залуучуу­дын чуулга уулзалтад сэт­гүүлч­дийн ба­гийг урьсан юм билээ.

Намайг машиндаа зай байвал хоёр сурвалжлагч аваад ирээрэй гэж захисны дагуу С.Цэмбэлдорж явсан. Нөгөө нэг сурвалжлагчийн утас нь холбогдоогүй учраас явж чадаагүй.

-Дундговиос хоёр тийш хөдөлсөн хоёр машин ой­рол­цоо хугацаанд осолд­сон нь олны гайхш­ралыг татсан?
-Тэр өдөр би өглөө Улаан­баатараас гараад замдаа Дундговиор орж залуучуудын уулзал­тад оролцсон. Тэгэхэд тэнд Ж.Наранцацралт сайд ирчих­сэн. Залуучуудтай сэт­гэгдлээ хуваалцаж аймаг орон нут­гийн хөгжилд оруулж буй хувь нэмрийг яаж дээш­лүүлэх, үнэлж цэгнэх вэ гэдэг талаар сэтгэгдэл тун өндөр байгаа нь харагдсан. Бид хамтдаа цай уучихаад үдийн хойно манай аймагт баригд­сан цагдаагийн хяналт тавих кобаны шинэ байгууламжийг очиж үзсэн. Энэ нь аймагт шинэлэг зүйл болж, гэр хороолол цагдаа­гийн хэсгээс зайтай учраас зүйтэй юм болж гэж ярьцгааж байсан.

Иймэрхүү яриа өрнөсний дараа Ж.Наранцацралт сайд эртхэн хот буцна, суурин ажилтай. Найз Ганбатын­хаараа орчихоод гарна даа гэж яриад тэндээс салцгаа­сан. Би хурлыг дуустал байж байгаад нэлээн орой цааш Өмнөговь руу гарсан. Харин сайдыг үдээс хойхно хот руу гарсан гэж ойлгож байсан.

-Та сайдыг эндсэн мэ­дээллийг хэзээ дуулав. Тухайн үед та шоконд ор­сон байх?
-Би Ж.Наранцацралт сай­­дыг осолд орсныг Гэмт­лийн эмнэлэгт ирээд нэг хо­нос­ны дараа сонссон. Тухайн үед ослын талаар надад дэл­гэрэнгүй яриагүй. Тийм осол болсон гэж бүрхэгдүү байд­лаар хэлсэн нь намайг шо­конд орох байх гэж сэрэм­жилснийх. Тэр үед миний ухаан санаа орж гарсан, дэн дун. Миний бие овоо гайгүй болсны дараа би бүгдийг сонссон. Манай нутгаас гар­сан төрийн зүтгэлтэн. Ний­гэмд байр суурь эзэлсэн төрийн түшээ тэр сайн хүнээ алдсан нь маш их гарз, хо­хирол болсон. Мөн жолооч нь эндсэн нь харамсалтай.

-Таны сууж явсан ма­шин юунаас болж осолд­соныг та мэдсэн үү?
-Арваннэгдүгээр сарын 12-ны шөнийн хоёр цагийн үед осолдсон. Манай Дундговийн­хон та хоноод яв гэхэд нь ажил төлөвлөсөн тул явахгүй бол болохгүй гээд шөнө хө­дөлсөн. Давхиж яваад Хан­хонгор сум өнгөрөөд аймгийн төв дөхсөнийг мэдсэн. За ороод ирлээ гэж тайвшраад, дөнгөж зүүрмэглэсэн. Нэг сэрсэн чинь гадаа хэвтэж байсан. Хамаг бие янгинаж өвдөөд. Осол техник талаа­саа болж гарсан гэж үзэж байгаа. Ховилтой зам дээр манай жолоочийн урд талын дугуй буудаад машин тэнц­вэрээ алдсан. Машин хөрвөө­гөөд годройтох агшинд би өөрийнхөө талын жижиг цон­хоор шидэгдээд гарсан. Сур­валжлагч залуу нөгөө цон­хоор. Бид хоёр ард талын цонхоор маш хүчтэй дарал­таар шидэгдсэн. Энэ үед урд талын цонх хагараагүй байсан. Жолоочийн яриагаар би 40 гаруй минут ухаангүй байсан гэсэн. Нэг сэрэхэд Өмнөговь аймагт ирж байсан. Нэг мэдэхэд хотод гэх мэтээр ухаан орж гараад л.

-Та ямар гэмтэл авсан бэ?
-Миний арван хэдэн ха­вирга хугарсан. Дал, өвчүү хугараад. Хоёр уушиг руу хугархай хавирга хатгаж цус алдаад. Хоёр уушиг бүр шал­чийчихсан.

-Та их хүнд иржээ?
-Хүнд байлгүй яахав. На­майг эхний тав хоногт сэхнэ гэж хэн ч баталгаатай хэлж чадахгүй байсан. Манай Гэмт­лийн эмнэлгийнхэн ялан­­гуяа сэхээний тасгийн­хан үнэхээр хүнийг аварч чаддаг алтан гартай эмч нар юм билээ. Тэр хүмүүсийн ачаар би босоод одоо юм яриад сууж байна шүү дээ. Дараа нь солонгос явж эм­чилгээ хийлгэсэн. Өмнөговьд осолдоход намайг нисдэг тэргээр хотод шуурхай ав­чирсан. Эмч нарын яриагаар хэрэв жаахан хугацаа алдсан бол асуудал өөрөөр эргэх байсан гэнэ лээ. Намайг ийм байдалд байхад аварсан ал­тан гарт эмнэлгийнхэн, тө­рийн түшээд, сэтгэлийн тэн­хээ өгч байсан нутгийнхан, иргэд, эрчим хүчний салба­рын­хандаа их баярлалаа гэдгээ илэрхийлье. Нутгийн дүү С.Цэмбэлдорж амьдрал нь ид цэцэглэх сайхан залуу насандаа азгүй тохиол таар­санд их харамсдаг. Хоёр хүүхэдтэй гэсэн. Эхнэр, хүү­хэд гэр бүлийнхэнд нь танай сониноор дамжуулан эмгэнэл илэрхийлье. Өнөөдөр бие маань бүрэн дүүрэн эдгээгүй. Овоо дээрдэж л байна. Удахгүй гэрт нь очиж уулзана гэж бодож яваа. Тэр хүнийг хүндэтгэж буян үйлдэх ёстой.

-Та гэр бүлийнхнийгээ танилцуулаач?
-Эхнэр, хоёр хүүхдийн хамт амьдардаг. Гэр бүлийн­хэн маань тухайн үед сэтгэл санааны хүнд байдалд бай­лаа. Интернэтээр намайг нас барчихсан гэж гарч байсан. Хүний амьдралд олон юм тохиолддог. Энэ бол зүгээр нэг тохиолдож болох явдлын нэг биш. Ийм осол дахин хэн нэгэнд бит­гий тохиогоосой билээ. Нутгийн минь уулс тулж, гэр бүлийнхний маань заяа түшсэн байх

-Давхацсан энэ хоёр осол танд яг юу гэж бо­догддог вэ?
-Дундговиос хоёр тийшээ явсан зам яг ижил байдаг. Өмнөговь ороход 280 км. Улаанбаатар мөн 280 км. Осол болсон зай бас хоо­рондоо их төстэй адилхан. Би Өмнөговь аймгийн төвөөс 26 км-ийн зайд осолдсон юм билээ. Талийгаач сайд 30-аад км зайд. Тэр утгаараа ойрол­цоо давхацсан юм бий. Хү­мүүс олон сэжиг таамаг дэв­шүүлэн ярьдаг, би тэрийг мэдэхгүй.

-Одоо таны ажил алба хэр их байх шиг байна?
-Түлш, эрчим хүчний яам салбарлан тусгаарлаж 2004 онд шинээр байгуулагдсан. Тэр цагаас хойш ажиллаж байна. Яамыг яам шиг, тө­рийн албыг төрийн алба шиг байлгаж ажиллахаар зүтгэж ажиллаж байна гэж боддог. Цаг хугацааны явцад гурван сайдтай ч ажиллалаа. Төрийн ажил төрийнхөөр явах ёстой зарчмыг барихын тулд зарим нэг хүнтэй санал бодол зө­рөл­дөх явдал гарч байсан. Шинэ сайдтайгаа гар нийлэн сайхан ажиллана. Одоо гэхэд цаасанд даруул­чихсан сууж байна.

-”Хадгаламж” банкны за­хи­рал асан С.Цэрэнпүрэв 14 тэрбум төгрөгийн хэрэгт нэр нь холбогдож байгаа мэдээ­лэл бий. Таны хувьд нэр нэгт гэдэг утгаараа андуурч та­шаарч ойлгох явдал хэр гарах уу?
-Хоёр өөр хүн учраас эндүүрэх явдал гардаггүй. Миний хувьд “Хадгаламж” банкны хэргийн талаар огт мэдэхгүй. Завхан аймгийн Цэрэнпүрэв гэдэг залуу “Хад­галамж” банкны захирлаар ажиллаж байсан гэдгийг нь мэд­нэ. Дараа нь удирдлага нь солигдож Базар гэж хүн бол­сон гэх мэтээс өөр мэдээ­лэлгүй.

/2008.01.25/