Сар шинийн барилдаан сайхан болох болов уу?

Шинэчлэгдсэн: 2008-02-04 11:08:05 УБ

Наадам ч дөхөж дээ гэдэг сэн. Цагаан сар харин дөхжээ. Цагаан сарын баярт зориул­сан үндэсний бөхийн барил­даан хэзээнээс нааш хамгийн үзүүштэй, ирэх наадмын өнгийг лавтайяа илтгэдэг билээ.


Харин сүүлийн жилүү­дэд манай алив бөхийн ба­рил­даан үзүүш харуушаар базаахаа байгаа юу даа. Энэ нь даян аварга А.Сүхбатыг зодог тайлснаас хойш гээд хэлчихэд баахан бурууда­хаар­гүй юм. Яагаав тэр жил Б.Ганбат аймгийн арслан байхдаа үзүүрлээгүй юү, үгүй ээ тэр чинь хэдэн он билээ, Ц.Магалжав аймгийн арслан байхдаа нэг сайн барилдсан даа гээд аман дээр гарч ирээд байдаг дурсамж са­нуулах барилдаан үнэхээр алга болж дээ. Уржнан гэхэд Б.Бат-Эрдэнэ аварга маань улсын хоёр аваргыг дараалан давж түрүүлээд, сайнаар хэлүүлээгүй. Аргагүй л ноо­хойтой юм болсон л доо, ямартаа хамаг үзэгчид ус ундааны сав нүүлгээд сүйд хийх шахсан. Өнөө жил харин цагаан сарын барилдаан урь­дын сайхнаараа болох болов уу гэж тандлаа. Ямартай ч, дархан аварга Б. Бат-Эрдэнэ барилдах төлөвтэй.

Далай аварга А.Сүхбат мэдээж ба­рил­дахгүй, бас Г.Өсөхбаяр аварга хөлийн гэмтлээс үүдээд зодоглож амжихгүй гэд­гээ зарласан. Д.Сумъяа­базар аварга харин бэлтгэл хийгээд л байгаа гэнэ, барил­даж ма­гадг­үй бололтой. Өд­гөө цагийн бөхийн дэвжээнд байж байвал чимэгтэй хэдэн сай­хан бөх уг нь байх. Гэвч үндэс­ний их баяр наадмаас өөр үед зодог шуудгандаа салхи оруу­лахгүй нь их бол­сон нь илэрхий. Ухаандаа өнгөрсөн наадмаас хойш улсын гарьд Б.Гантогтох, заан Ч.Батзориг нар ер барилдаж үзэгдсэнгүй. Одоо цагаан сарын барил­даанд гарах эсэх нь ч тодор­хойгүй аж. Ц.Цэрэн­пунцаг гарьдын хувьд бол албан ёсоор зодог тайллаа гэж зар­лаагүй л болохоос, зодог тайлж дээ.

Бөхийн шинэ хор­хойт­нууд “Тийм бөх байдаг билүү” гэх янзтай. Амархан л мартагддаг юм байна л даа. Гэвч чухам барилдаасай, “Пунцаг аа, Пунцаг аа…” гэх нь ч зөндөө. Д.Мөнх-Эрдэнэ арслан, Б.Ганбат заан нар ч тоотойхон барилдах болжээ. Ер нь манай бөхчүүдийн энэ үеийн том цолтнууд нэг тийм хойргодуу л байдалтай. Энэ ца­гаан сарын барилдаанд маргаангүй барилдах том цолтнууд бол арслан Х.Мөнх­баатар, Д.Азжаргал, гарьд И.Доржсамбуу, заан Ц.Мяг­мар­сүрэн, Д.Амгаланбаатар нар л байх бололтой. Ер нь барилдааны өнгө энэ хэд байх юм шиг байна даа.

Өнөө жилийн цагаан са­рын барилдаанд харцага Н.Ган­баатар, аймгийн арслан А.Бямбажав, Ш.Жар­гал­сай­хан, Б.Соронзонболд, Р.Түв­шин­баатар нарыг бөхийн хор­хойтнууд нэлээд харж, сонир­хох болов уу. Илтэд идэвх­тэй, барилдааныг сонирхол­той болгож байгаа залуус бол эд юм. Түүнчлэн Ө.Даваа­баа­тар, Ч.Чулуунбат зэрэг айм­гийн арслангууд ч бас сайн барилдаж байгаа билээ. Өнөө жилийн сар шинийн өдрийг угтаж маргаашнаас буюу тавны өдрийн арван цагаас эхлээд хэд хэдэн барилдаан болох нь. Өсвөрийн 128 бө­хийн барилдаанаар эхлээд, мөн өдрийн 14 цагаас нийт бөхчүүдийн шандастны ба­рил­даан, 17 цагаас аймаг цэр­гийн цолтнуудын өргөтгө­сөн барилдаан тус тус болох аж. Маргааш нь 15 цагаас мөн аймаг, цэргийн цолтой бөх­чүү­дийн, долооны өдрийн 14 цагаас улс, аймаг, цэргийн цолтой 256 бөхийн барилдаан тус тус болох юм байна. Сар шинийн өмнөх барилдаанууд сайхан болоосой, сайхан болгох бөхчүүд барилдаасай.

Өдрийн сонин