Эрх мэдлийн төлөөх тэмцэл буюу В.Путины хөрөнгө

Шинэчлэгдсэн: 2008-02-05 10:09:33 УБ

Путин удахгүй Ерөнхий­лөгчийн албаа өгөх гэж байгаа тул Кремльд эрх мэдлийн төлөөх нэлээд ширүүн тэм­цэл өрнөөд байгаа тухай “The Guardian” сонинд бичжээ. Кремльд өр­нөөд буй тэмцэл нь эд хөрөн­гөтэй хол­боотой юм.



Гэтэл В.Путин халаагаа Д.Мед­ве­девт өгөх гэж байгаа. Оросын улс тө­рийн ертөнцийн ажиг­лагчдын ярьж байгаагаар эрх мэдлийн төлөөх тэмц­лийн цаана тө­рийн мэдэлд байдаг компа­ниудын үнэт цаастай холбоо­той асуу­дал байгаа гэнэ. В.Путин Ерөн­хийлөгч болоод 40 тэрбум ам.доллартай тэн­цэх эд хө­рөн­гөтэй болсон гэнэ. Түү­нээс гадна В.Путин Швейцарь бо­лон Лихтенш­тейнд нэлээд хөрөнгөтэй тухай яригдах боллоо. Ер нь Оро­сын Ерөн­хийлөгчийн ху­вийн эд хөрөн­гийн талаархи асууд­ал өнгөр­сөн сараас нэлээд эрчимтэй яригдах болсон. Улс төр суд­лаач С.Бе­ловский Германы “Die Welt” сонинд өгсөн ярилц­лагадаа энэ та­лаар анх дуу­гарсан юм. Түүний дараахан “Washington Times”, “Moscow Times” со­нинууд энэ тухай нийтлэл гаргасан юм. ОХУ-ын Ерөн­хийлөгчийн за­саг захир­гаа­ны нэрээ нууцалсан нэг ажилтнаас авсан мэ­дээл­лээр В.Путин 40 гаруй тэрбум ам.дол­лар­тай тэнцэх эд хө­рөнгөтэй болчихоод байгаа талаар дээр дурьд­сан.

Ин­гэс­нээр тэр Орост тө­дий­гүй Евро­пын тэргүүн бая­чуудын жаг­саалт орж байгаа юм. Улс төр судлаач Белковс­кий үүнийг батлах дараахь барим­туудыг дурд­жээ. В.Путин Оро­сын нефть болон хий олбор­лолтын салбарт үйл ажил­­­лагаа явуулдаг компа­нийн хувьцаа­ны нэлээд хэмжээг эзэмшдэг юм байна. Гэхдээ мэдээжийн хэрэг нууцаар. Орост гуравду­гаарт ордог “Сургутнефть” компа­нийн 20 тэрбум ам.дол­лартай тэнцэх хувьцаа Ерөн­хий­лөг­чийн мэд­­лийнх. Мөн “Газп­ром”-ийн хувьцаанаас доод тал нь 4.5 хувийг эзэм­шиж, Швей­царийн “Gunүor” компанийн хувьцаа ч түү­нийх. Тус ком­па­нийг Ерөн­хий­лөг­чийн найз Геннадий Тимченко байгуул­жээ.

Улс төр судлаач Белковс­кий Оросын Ерөнхийлөгч В.Путины хөрөнгийн талаар ярих­даа “Доод тал нь 40 тэр­бум ам.доллартай тэнцэнэ. Дээд тал нь хэд гэдгийг би мэдэх­гүй. Түүнээс гадна өөр бизнестэй байх ч магадлал­тай. Энэ талаар бидэнд тодор­хой мэ­дээлэл байхгүй” гэжээ. Мэ­дээ­­жийн хэрэг дээрх ком­паниудын албан ёсны хувь­цаа эзэм­шигчдийн жагсаал­тад Оро­сын Ерөнхийлөгчийн нэр байх­гүй. Түүний мэдлийн маш олон компани, сангууд байдгийн зарим нь Цуге, Лихтенштейнд байрла­даг аж. С.Белковс­кий мэдэгдэхэд В.Пу­тин хариуд нь ямар нэгэн тайлбар хийгээгүй. “The Guardian” сонин ч эдгээр баримтыг Кремлийнхэнд гар­гаж тавьсан боловч Оросын Ерөнхий­лөгчийн хэвлэл мэ­дээл­лийн асуудал хариуцсан нарийн бичгийн дарга нь В.Путин эзгүй гэсэн хариу өгчээ.

Урьд өмнө нь Оросын Ерөнхийлөгчийн эд хөрөнгө­тэй холбоотой ямар нэгэн зүйл ярих хориотой байсан. Гэвч Кремль дэх бүлгүүдийн хоорондох зөрчилдөөн сүү­лийн үед ширүүсэнээс мэдээ­лэл алдагджээ. Кремлийн бүлгүүдийн нэгнийх нь тэр­гүүлэгч нь Ерөнхийлөгчийн засаг захиргааны орлогч дар­га И.Сечин, холбооны аюул­гүйн албаны дарга Н.Патру­шев, түүний орлогч А.Бортни­ков, В.Иванов нар гээд хүчний байгууллагынхан байдаг. Ха­рин либерал үзлийг барим­талдаг В.Путин болон Б.Ель­циний гэр бүлийнхэнд ойр байдаг бүлэгт Р.Абрамович, Д.Медведев нар багтдаг юм.

Энэ бол үзэл бодлын зөр­чил­дөөн бус бизнесийн тэм­цэл. В.Путин Д.Медве­девт халаагаа өгөх болсон нь И.Се­­чиний бүлэгт маш том цохилт болжээ.

Зарим ажиглагчдын ярьс­наар В.Путин ажлаа өгөөд явах байсан боловч тодорхой хугацаанд хүчнийх­нээс Д.Мед­ведевийг хамгаа­лахын тулд үлдэхээс өөр аргагүй болсон гэнэ. Тиймээс ч Ерөн­хий сайдын албыг хашихаас татгалзахгүй гэдгээ өөрөө хэлсэн байна.

В.Путиныг “Time” сэтгүүл оны хүнээр шалгаруулсан билээ. Үүнтэй холбогдуулан тус сэтгүүлд ярилцлага өгөх­дөө Кремлийнхэн хээл ха­хуульд автсан гэдгийг эрхэм Ерөнхийлөгч үгүйс­гэсэн. Түүн­тэй ойр байдаг хүмүүс хээл хахуулиар баяж­сан талаар асуухад “Тэгэх­ээр хэн, яаж баяжсаныг та мэдэж байгаа юм байна. Та үүндээ итгэлтэй байгаа бол манай ГХЯ-нд бичээрэй. Та тэр хүмүүсийн нэр төдийгүй хээл хахуулийн схемийг мэ­дэх юм байна. Бидний энэ уулзалтыг харж, сонсч, унш­сан хүмүүст үүний хариуд маш хурдан, ОХУ-ын Үндсэн хуулийн хү­рээнд арга хэмжээ авна гэдгийг би танд батал­гаа­тайгаар хэлье” гэж байсныг олон хүн санаж байгаа биз.

Я.МӨНГӨНЦЭЦЭГ
Өдрийн сонин