|
Д.Медведев үнэмлэхүй ялалт байгуулав
Шинэчлэгдсэн: 2008-03-04 13:08:12 УБ Дмитрий Анатольевич Медведев Оросын Ерөнхийлөгчийн сонгуульд үнэмлэхүй ялалт байгуулсныхаа дараа одоогийн удирдагч В.Путиний бодлогыг үргэлжлүүлнэ гэж мэдэгдлээ.
Төрийн Думийн сонгуулиас яг гурван сарын дараа өнгөрөгч ням гаригт хойд хөршийнхөн гурав дахь Ерөнхийлөгчөө тодруулав. Москвагийн цагаар өчигдөр 10.30 цагийн үед авсан мэдээгээр, Сонгуулийн төв комисс саналын хуудасны 99.5 хувийг тоолж амжсан байна. Үүгээр “Нэгдмэл Орос”-оос нэр дэвшигч, 43 настай Д.Медведев сонгогчдын 70.23 хувийн дэмжлэг хүлээн, эхний шатанд итгэлтэй ялалт байгуулсан нь тодорхой боллоо.
Удаад нь Коммунист намаас нэр дэвшигч Геннадий Зюганов 17.76 хувийн саналаар оржээ. Либерал ардчилсан намын дарга Владимир Жириновский 9.37 хувь, энэ оны сунгааны ганц бие даагч, Ардчилсан намын лидер Андрей Богданов 1.29 хувийн санал тус тус авсан тухай СТК-ын тэргүүн Владимир Чуров сонгуулийн дүнгийн талаар хийлгэсэн эхний хэвлэлийн хурал дээр танилцуулав.
Д.Медведевийн төлөө 51 сая 940.599 сонгогч, Г.Зюгановт 13 сая 131.993, В.Жириновскийд зургаан сая 930.340, А.Богдановт 965 мянга 567 сонгогч саналаа өгсөн аж.
Энэ оны сонгуульд анх удаа нэр дэвшсэн хоёр хүний нэг нь Д.Медведев. Тэрбээр авсан саналын тоогоороо дөрвөн жилийн өмнө сонгогчдоос В.Путиний хүлээсэн дэмжлэгийг давжээ. 2004 оны Ерөнхийлөгчийн сонгуульд В.Путиний төлөө 49 сая 565.238 иргэн санал өгсөн нь нийт сонгогчийн 71.3 хувьтай тэнцжээ. Мөн сонгогчдын идэвх ч өнгөрөгч сонгуулийнхаас /64.38 хувь/ өндөр буюу 69.61 хувьтай байна.
Ерөнхийлөгчөөр сонгогдох болзлыг биелүүлсэн нь илт болмогц Д.Медведев даваа гаригийн шөнө сонгуулийн штабтаа хэвлэлийн хурал зохион байгуулсан. Энэ үеэр сэтгүүлчдийн асуултад хариулахдаа “Сүүлийн найман жилд авч хэрэгжүүлсэн, олон улсын эрх зүйн хэм хэмжээний хүрээнд Оросын ашиг сонирхлыг боломжтой бүх аргаар хамгаалахад гол утга санаа нь орших бие даасан гадаад бодлого баримтална” гэв. Мөн Ерөнхийлөгч хийгээд Ерөнхий сайдын бүрэн эрхийг дахин хуваарилах бодолгүй буйгаа Д.Медведев нотолжээ. Ерөнхий сайдаар В.Путин томилогдсоноор түүнтэй гар нийлэн ажиллана гэж тэр найдаж байна.
МОСКВА, ПИТЕРТ ЗӨРЧИЛ ОЛОН ГАРЧЭЭ
Сонгуулийн үеэр хууль зөрчсөн олон ажиллагаа Оросын янз бүрийн мужид гарсан тухай сэтгүүлчид, сөрөг хүчний улс төрийн намуудын ажиглагчид, олон нийтийн байгууллага, хүний эрхийг хамгаалагчид мэдээлсээр байна. Энэ тухай статистикийг “Орос дахь хүний эрх” сайтаас харж болохоос гадна “Яблоко”, Коммунист нам, Барууны хүчнүүдийн холбоо бүртгэл хийж байна. Хамгийн түгээмэл гарсан зөрчил нь саналын хуудас орлуулах, бичиг баримтыг зүй бусаар ашиглах явдал байжээ. Думийн өнгөрөгч сонгууль хамгийн цэвэр болсон хэмээн сөрөг хүчний мэдэгдсэн Москва, Санкт-Петербургт Ерөнхийлөгчийн сонгуулийн үеэр олон зөрчил илэрчээ. Парламентын сонгуульд улсын дундажтай харьцуулахад сул дэмжлэг хүлээсэн дутагдлаа “Нэгдмэл Орос” энд залруулахыг оролдоо юм болов уу.
Г.ЗЮГАНОВ ШҮҮХЭД ХАНДАЖ, В.ЖИРИНОВСКИЙ ДАХИН НЭР ДЭВШИНЭ
Г.Зюганов сонгуулийг будлиантуулсан гэх баримтыг үндэслэн шүүхэд хандахаа мэдэгдэв. Нотлох баримт Коммунист намынханд хангалттай байгаа гэнэ. “200 шахам зөрчлийн тухай мэдээлэл миний гар дээр цуглаад байна” гэж КН-ын лидер ярьжээ. “Оросын өмнө тулгарсан асуудлуудыг шийдэхэд Ерөнхийлөгчийн сонгуулийн дүн туслахгүй. Гүйцэтгэх засаглалын одоогийн бүрэлдэхүүн хэвээр үлдвэл асуудал шийдэгдэхгүй” гэж тэр үзэж байна.
ЛАН-ын дарга В.Жириновский ирэх сонгуульд дахин нэрээ дэвшүүлнэ гэж амлав. “Дараагийнх төдийгүй ер нь амьсгал хураатлаа би сонгуульд оролцоно гэж бодож байгаа. Бүр талийгаач болсон хойноо ч булшин дороос би энд хэвтэж байгаа шүү хэмээн та бүхэнд дохио өгнө” гэж сэтгүүлчдийг “айлгав”. Сонгуульд хүлээсэн дэмжлэгтээ сэтгэл хангалуун бус буйгаа нэрэлхэлгүй өгүүлээд, “Намайг баярлуулах хувилбар ганц л бий. Би зөвхөн ялахыг хүснэ” хэмээн үндсэрхэг үзлээрээ нэртэй эл улстөрч ярилаа. ЛАН-ын тэргүүн өөрийгөө хүн амын 40-өөс доошгүй хувийн санал авсан гэж үзэж байгаа ч шүүхээр заргалдаад юу ч олж долоохгүй гэв. Сонгуулийн өмнөх кампани хэрхэн явагдсаныг тэрбээр сануулахаа мартсангүй. Эрх баригчдын намын нэр дэвшигчийг бодвол өөрийгөө телевизээр 30 дахин цөөн гарсан гэж В.Жириновский хэлжээ.
Х.КЛИНТОН, Б.ОБАМА НАР ГОСОЙВ
АНУ-ын Ерөнхийлөгчид Ардчилсан намаас нэр дэвшигч Хиллари Клинтон, Барак Обама нар Оросын Ерөнхийлөгчийн сонгуульд сэтгэл гонсгор буйгаа илэрхийлжээ. Х.Клинтон “Чөлөөт хэвлэл мэдээллийн хэрэгсэл болон өөрийн өрсөлдөгчдийг В.Путин дарж, сонгуулийг хэлбэрдлээ” гэж шүүмжлээд, “Америк, Оросын хооронд шийдэгдээгүй асуудал хуримтлагдсан төдийгүй тоо нь өсч байна. Хэрэв би Ерөнхийлөгч болбол терроризмтэй тэмцэх, цөмийн зэвсгийг дэлгэрүүлэхгүй байх зэрэг бидний ашиг сонирхол нийлэх чиглэлд Оростой хамтрахад бэлэн” гэв. Харин Обама тэргүүн хатагтай асныг бодвол арай зөөлөн үг хэлжээ. Чөлөөт хэвлэл, сөрөг хүчнийг дарсны улмаас сонгууль бүрэн төгс эрх чөлөөтэй, цэвэр болоогүйд сэтгэл дундуур байна гэлээ.
ЕРӨНХИЙЛӨГЧИЙН ТАНГАРАГ ӨРГӨХ ӨДӨР ЗАСГИЙН ГАЗАР ОГЦОРНО
Шинээр сонгогдсон Ерөнхийлөгчийн тангараг өргөх өдөр Засгийн газар огцорно гэж Д.Медведевийн сонгуулийн штабын Эрх зүйн газрын дарга Гарри Минх мэдээллээ.
Тавдугаар сарын 7-нд шинэ Ерөнхийлөгч тангараг өргөнө. Тэр болтол одоогийн Засгийн газар бүрэн бүрэлдэхүүнээрээ ердийн дэглэмээр ажиллах аж. Өөрөөр хэлбэл “үүрэг гүйцэтгэгчид” болохгүй гэнэ. Шинэ Ерөнхийлөгч тангараг өргөн, албан ёсоор ажлаа авсны дараа Ерөнхийлөгчийн засаг захиргаа болон Засгийн газарт боловсон хүчний өөрчлөлт оруулах хувилбарыг Оросын эрх баригчид илүүд үзэх нь бололтой.
Өнөөдөр /2008.03.04/
|
GlobalCEO: Миний дэлгүүрийн сүлжээнд ажиллав
