Намаа гэх үү, амиа бодох уу

Шинэчлэгдсэн: 2008-03-07 12:01:32 УБ

СОНГУУЛЬ - 2008
УИХ-ын ирэх сонгуульд нэр дэвшихийг хүсэгчид ийм ацан шалаанд оржээ.

Учир нь энэ жилийн сонгууль томсгосон тойргоор болно. Өмнө нь жижиг тойргоор сонгууль явагддаг байсан болохоор “дайсан” нь тодорхой байж. Өөрөөр хэлбэл, өөр намын нэр дэвшигчидтэй л үзэж тарж, үсэрч наалдахад хүрдэг байлаа.

Гэтэл энэ удаа байдал эрс, бүр 180 градусаар эргэлээ. Өрсөлдөгчийг өөр намаас төдийгүй өөрийн намаас ч хайх хэрэг гарч байна. Тиймээс л намаа гэх үү, амиа бодох уу гэсэн асуулт сонгуульд нэр дэвшихийг горилогч хүн бүхний өмнө, том жижиг нам, эвсэл хөдөлгөөний гишүүн гэлтгүй, хоолойд тулгасан хутга мэт зоогдчихоод байна.

Сүүлийн үед аливаа сонгуульд монголчууд эхийг нь эцээж, тугалыг нь тураахгүй гэсэн зарчмаар хандах болоод байгаа нь нууц биш. Тиймээс намуудын нэр дэвшигчдээс нэг нэг хүнийг сонгон нэрийг нь дугуйлчих магадлал маш өндөр. Үүнийг эрхэм улстөрчид их эрт мэдрэлгүй яах вэ?! Тэгээд хашрууд янз бүрийн гарц хайж эхэлжээ. Эцэст нь нэг боломж олж харав. Тэр нь намаасаа чансаа тааруу, нэр хүнд муутай хүмүүсийг нэр дэвшүүлэх.

Иймээс өөр намын өрсөлдөгчид одоохондоо сонин биш болчихоод байна. Уг нь жижиг тойргоор өрсөлддөг байхад нэг намын нэр дэвшигчид ахан дүү мэт ижилсэж, анд нөхдөө дэмждэг байлаа. Тухайлахад, 2000 оны сонгуульд Завхан аймагт Д.Оюунхорол, Б.Шаравсамбуу нарыг ялахад талийгаач Ш.Отгонбилэгийн үүрэг оролцоо үнэхээр их байсан гэдэг юм. Тэрбээр намынхаа нэр дэвшигчдийн тойрогт давхар ажиллаж, сум, багийн төвд болсон уулзалтад биеэр оролцож, халуун дулаан үгээ хэлж явсан гэдэг.

Эдүгээ ийм халуун сэтгэл гаргах хүн цөөхөн ч гэсэн байх биз. Энэ нь наанадаж нэр дэвшүүлсэн намынхаа, цаанадаж улс орныхоо эрх ашгийг тэргүүнд тавьдаг цөөхөн хүний эр зоригийн асуудал болон хувирна.

Үүнээс гадна томоохон намын лидерүүд нэр сүр багатайхан нэгэнтэй хамт аймаг, дүүрэгт нэр дэвшихийг эрмэлзэхээс гадна хөрөнгө чинээг нь нэлээн харах төлөвтэй. “Ахынхаа нөмөрт давхиад байхад парламентын гишүүний зөөлөн суудал ойрхон шүү” гэж хошгируулж байгаад сонгуулийн зардлаа, үгүй ядахнаа талыг нь ч болсон даалгачих ухаан гаралгүй дээ энэ чинь. Ийм жишээ нэгэнт сонсогдоод эхэллээ.

Тиймээс энэ сонгуулиас их юм хүлээх хэрэггүй мэт. Хэрвээ сонгууль С.Баярын санал болгосон пропорциональ системээр болсон бол байдал тэс өөрөөр эргэх байлаа. Харамсалтай нь нэгэнт галт тэрэг хөдөлчихжээ.

Өнөөдөр /2008.03.07/