Гадаадад ажиллаж байгаа иргэд сонгуульд оролцохгүй болсондоо сэтгэл дундуур байна

Шинэчлэгдсэн: 2008-03-11 12:00:02 УБ

-Гадаадад ажиллаж амьдарч байгаа иргэд сонгуульд идэвхтэй оролцох хүсэлтэй байгаа юм байна гэж ойлголоо. Та ямар оронд ажиллаж байгаа вэ?

-Бидний хэдэн хүн Солонгос улсад ажиллаж амьдардаг. Нэг их улстөрийн үйл ажиллагаа явуулж нам хөдөлгөөн байгуулаад байгаа юм биш.
Харин ИЗН-ыг дэмжиж ажилладаг. Өмнө нь ямар нэгэн хэмжээгээр гэр орныхноороо дамжуулаад сонгуульд оролцож л байсан. Харин ирэх сонгуулиар саналаа өгч чадахгүй юм байна. Уг нь гадаадад ажиллаж амьдарч байгаа Монгол улсын иргэд иргэнийхээ эрхийг эдлээд сонгуульд оролцох нь гэж хэрдээ л баярлаж байсан .Харамсалтай нь өнгөрсөн оны сүүлээр Сонгуулийн хуулинд тусгасан байсан Гадаадад ажиллаж амьдарч байгаа иргэдийн санал өгөх эрхийг нь хасчихлаа. Бид ямар тэндээ насан туршдаа ажил хийгээд явах биш дээ. Төрийн эрх барих ганц боломжоо эдлэж байсан бол аштай юу. Үүндээр Солонгост болон гадаадад ажиллаж амьдарч байгаа иргэд маш их сэтгэл дундуур байгаа.

-Өнгөрсөн оны сүүлээр гадаадад байгаа монгол иргэдийг сонгуульд оролцуулах эрхийг нь хасахад та нар яаж хүлээж авсан бэ?
-Нэгэнт л Монгол улсын иргэн нь болж төрсөн юм чинь орон зайнаас үл хамаараад тэр эрхээ эдэлмээр байна. Гадаадад ажиллаж байгаа гэдгээр завсар зайтай эрхээсээ хасагдаж баймааргүй байна. Үндсэн хуулинд заасанаар нэгэнт иргэн нь мөн юм бол тэр эрхээ эдлэх л ёстой шүү дээ. Ямар гадаадад байгаа монголчууд Монгол улсын иргэн биш гээгүй л байлтай. Нөгөө ертөнцөд очсон хойноо л тэр эрхээ хасуулна уу гэхээс ямар нэгэн намын, ямар нэгэн парламентын хуулиар тасалдаад байх ёсгүй. Тиймээс үүнийг намууд нь тухайн үед яаж зохицуулж явмаар байгаа юм тэрнийгээ л энэ хууль дүрмэндээ бат нот суулгаж өгмөөр байна. Зарим нэг эрх ашгийн зөрчилөөс болоод нэг оруулж батлаад, дургүйгээ хүрэхээр хасчихдаггүй баймаар байна.

-Сонгуулийн хуулинд сүүлд нэмэлт өөрчлөлт оруулахдаа гадаадад байгаа иргэдээс санал авах бололцоо муу гэдгээр хассан. Ер нь тэнд байгаа иргэд саналаа ямар байдлаар өгөх бололцоотой вэ?
-Өнөөдөр дэлхий дахины хөгжлийг дагаад санал өгөх байтугай боломж нь хангалттай байна шүү дээ. Интернет битгий хэл тэрнээс давуу дэвшил гарсан байхад түүнийг олж харахгүй байна гэдэг улс төрчдийн л амбиц байх. Саналыг ямар ч хэлбэрээр авч болно. Харин түүнийг авахгүй гэдэг үүднээс хараад байвал, санаачлага гаргахгүй байвал яаж бүтэх вэ дээ. Ялангуяа манай орны хувьд мэдээлэл технолог хурдацтай хөгжсөн байна. Үүнийгээ ашиглаад санал авах бүрэн боломж бий.

-Бас гадаадад ажиллаж байгаа иргэд хар, цагаан янз бүрээр ажиллаж байгаа нь сонгуульд оролцоход төвөгтэй гэсэн шалтгааныг улс төрчид ярьсан л даа. Ялангуяа Солонгос зэрэг оронд хараар ажиллаж байгаа хүмүүсийг бараг бариад өгчих ухааны юм ярьсан. Үүн дээр та нар ямар бодолтой байсан бэ?
-Тийм эмзэглэл байх ёсгүй. Байдаг ч үгүй юм. Тэр бол зүгээр сонгуулийн хууль дүрэм баталж байгаа боловсруулж байгаа цаашдаа өөрсддөө зохицуулж байгаа улсуудын яриа байх. Тэрнээс ардчилал хөгжижчихсөн оронд сонгууль өгснийх нь төлөө барьж ачаад нутаг буцаана гэсэн ойлголт байхгүй. Үүнийг бол би баттай хэлж чадна.

Өглөө орой /2008.03.11/