Бусдын санаачилгыг булаах хэрэг байна уу

Шинэчлэгдсэн: 2008-06-13 17:58:59 УБ

МАХН "Эх орны хишиг-1500000" гэсэн мөнгөн дүнгээрээ ч, хэрэгжих үндэслэлээрээ ч тэр "Эрдэнийн хувь"-аас хол давсан амлалтаа олонд ил гаргаж ирснээс хойш АН-ынхан сандрахын учир юу вэ?
Байгалийн баялгаас олсон ашгаасаа ард түмэнд жигд хүртээх тухай анх төр засагтаа албан ёсоор санал тавьсан хүн бол УИХ-ын гишүүн, Говийн хөгжлийг дэмжих ТББ-ын нэгдсэн холбооны тэргүүн Цэрэндашийн Оюунбаатар билээ.

Тэрбээр УИХ-ын гишүүн байхдаа 2003.02.15-нд УИХ-ын Эдийн засгийн байнгын хороонд "Үндсэн хуулийн заалт хэрэгжүүлэх тухай" гэсэн албан бичиг хүргүүлжээ. Энэхүү санаагаа хэрэгжүүлэхийн тулд МАХН-ын даргын тэргүүлсэн Засгийн газар "Эх орны хишиг" –ийн тухай хуулийн төсөл боловсруулж УИХ-д өргөн барьсан боловч АН-ынхан зөвшөөрөөгүй билээ. Энэ бүхэн бол өчигдөрхөн болж өнгөрсөн үйл явдлууд. Гэтэл өнөөдөр болохоор АН-ынхан "Эх орны хишиг"-ийг "Эрдэнийн хувь" болгож хувиргачихаад бид санаачилсан юм, бид өгөх гэж байгаа юм гээд сонгуулийн шоу хийж, үүгээрээ сонгуульд ялна гэсэн бүрэн итгэлтэй бардамхан байж байтал "Эх орны хишиг"-ийг сонсонгуут байж суух газраа олж ядах болов.

Атган дахь ганц "Том хөзөр"-өө алдаад, арга нь мухардаад ирэнгүүт хэвлэлүүдээр нэг сүр бадраан "МАХН хууль зөрчиж байна" хэмээн зарга мэдүүлж, цуу тараасаар байна. Үнэхээр л хууль зөрчсөн юм бол үүнийг шийдвэрлэдэг шүүхийн байгууллага гэж байдаг биз дээ. Цуу яриагаар асуудал шийдэж, цугласан олон болгон хууль баталдаг байсан бол энэ оронд хөл толгой, төр засаг, шүүх засаглал байсны хэрэг байна уу. МАХН улс төрийн хувьд нийгэм дамжсан туршлагатай нам атал ийм багахан зүйлийг мэдэхгүй алдах нь юу л бол…
МАХН-ын төлөөлөн удирдах дээд байгууллага болох намын Бага хурлын III хуралдаанаар (2008 оны 5 дугаар сарын 19-ний өдрийн) 2008 оны УИХ-ын сонгуульд МАХН-аас оролцох Мөрийн хөтөлбөрөө хэлэлцэн баталсан билээ. Түүнд "Эх орны хишиг"- ийн талаар тодорхой заалт оруулж өгчээ. Тухайлбал Мөрийн хөтөлбөрт "Стратегийн зарим орд газруудыг түшиглэн үндэсний корпораци, групп байгуулах замаар Монголын иргэн бүрийг хувьцаа эзэмшигч болгож ашгаас нь тогтмол хувь хүртэж байх нөхцөл, арга замыг судалж хэрэгжүүлнэ" гэсэн байна.

МАХН-ын Бага хурлын IV хуралдаанаас Намын Удирдах Зөвлөлд "УИХ-ын 2008 оны сонгуульд оролцох Мөрийн хөтөлбөрийг дэлгэрүүлж тайлбарлах, сурталчлах үндсэн чиглэлийг боловсруулж батлах" эрхийг олгосон болно. Үүнийг үндэслэн намын Удирдах Зөвлөлийн 2008 оны 6 дугаар сарын 4-ний өдрийн хуралдаанаар "УИХ-ын 2008 оны сонгуульд МАХН-аас оролцох Мөрийн хөтөлбөрийн зарим зорилтуудыг дэлгэрүүлж тайлбарлах тухай" 32 тоот тогтоол гаргажээ. Түүнийхээ дагуу хийсэн үйлдлийг нь "хууль бус" хэмээн гүтгэж сууцгаана.

Энэ бүхэнд толгойгоо гашилгаж суухаар өөр хэрэгтэй зүйлдээ үнэт цагаа зарцуулсан нь хавьгүй дээр биз дээ. Хуулийн байгууллагын шийдэх асуудлыг бусад нь булааж ярих хэрэггүй баймаарсан.

Г. Жаргал