|
Ази номхон далайн орнуудын мэдээлэл, харилцаа холбооны стандартчлалын олон улсын хурал эхэллээ
Шинэчлэгдсэн: 2007-07-25 19:02:13 УБ Дэлхийн улс орнуудын мэдээлэл, харилцаа холбооны сүлжээ, тоног төхөөрөмжүүд нь улам бүр дэлхий нийтийг хамарсан эвсэн нэгдэх шинжтэй, харилцан нээлттэй болж, утасгүй холбоо, сансарын хөдөлгөөнт холбоо, компьютер, харилцаа холбоо болон радио телевиз өргөн нэвтрүүлэгийн нэгдмэл технологи нэвтэрч, сүлжээний мултимедиа орчныг бүрдүүлэх чиг хандлагаар хөгжиж байна.
Мэдээлэлжсэн нийгэм байгуулах зорилтыг хэрэгжүүлэхэд мэдээлэл, харилцаа холбооны төрөл бүрийн сүлжээ, төгсгөлийн тоног төхөөрөмжүүд хоорондоо холбогдох, харилцан ажиллагааг найдвартай хангах үндсэн нөхцөл нь стандарт юм. Шинэ техник, технологийн стандарт, шаардлагыг боловсруулан өргөн нэвтрүүлж мөрдснөөр харилцаа холбоо, мэдээллийн сүлжээ болон тоног төхөөрөмжийн ашиглалт үйлчилгээний үр ашгийг дээшлүүлэх, шудрага өрсөлдөөний таатай нөхцөл бүрдүүлэх, харилцан холбогдох, үйлчилгээний чанар, хамрах хүрээг нэмэгдүүлэх, хэрэглэгээний шинэ үйлчилгээг нэвтрүүлэхэд чухал ач холбогдолтой гэж олон улсын байгууллага, улс орнууд үзэж байгаа билээ.
Ази, номхон далайн цахилгаан холбооны байгууллага /АНДЦХБ/ болон Монгол Улсын Мэдээлэл, харилцаа холбоо, технологийн газар, Харилцаа холбооны зохицуулах хороо /ХХЗХ/ хамтран Ази, номхон далайн орнуудын мэдээлэл, харилцаа холбооны стандартчиллын олон улсын хурал 2007 оны 7 дугаар сарын 24-26-ны өдрүүдэд Улаанбаатар хотноо Их тэнгэр цогцолборт эхэлж байна. Хурлыг МХХТГ-ын дарга Ч.Сайханбилэг, АНДЦХБ-ын гүйцэтгэх захирлын орлогч Т.Яамада нар нээж хурлын ач холбогдлыг өндөр үнэллээ. Энэхүү хуралд тус байгууллагын гишүүн Афганистан, Балба, Бангладеш, Бутан, БНХАУ, БНЭУ, БНАЛАУ, Япон, Филиппин, Папуа Шинэ Гвиней, Пакистан, Шри Ланк, Иран, Вьетнам зэрэг 20 гаруй орны болон Монголын 100 гаруй зочид, төлөөлөгчид оролцож байна.
Хурлын үеэр бүс нутгийн орнуудын мэдээлэл, харилцаа холбооны салбарын стандартчиллын өнөөгийн байдал, тулгарч буй бэрхшээл, түүнийг даван туулах арга зам, шинэ үеийн сүлжээ, үүрэн телефоны 3 дахь үе, интернэт телевиз, тээврийн ухаалаг систем, утасгүй технологийн стандартчиллын үйл ажиллагааны хөгжил, Дэлхийн цахилгаан холбооны стандартчиллын их хуралд Ази, номхон далайн бүс нутгийн орнуудын байр суурийг нэгтгэх тогтоолын төсөл, оруулах зөвлөмж санал зэргийг хэлэлцэж, хурлаас холбогдох баримт бичгүүдийг гаргана.
Хурлыг зохион байгуулахад ХХЗХороо, МЦХ ХК, Мобиком корпораци, Скайтел ХХК, Юнител ХХК зэрэг олон байгууллага, компаниуд санхүүгийн дэмжлэг үзүүлсэн байна.
Мэдээлэл, харилцаа холбоо, технологийн газар
|
GlobalCEO: Миний дэлгүүрийн сүлжээнд ажиллав
